Ek het ’n groter voertuig met meer pakplek nodig gehad. Voor die X-Trail het ek ’n outomatiese Mercedes-Benz C240 gery. Die Merc was ’n absolute plesier, maar sy dienste by die agente het ons ’n bietjie onverhoeds betrap.
Ons is ’n gesin van drie – ek, my vrou, Liezel, en Adriaan, ons baba van 20 maande.
Vir dié mannetjie het ons altyd baie plek nodig aangesien sy stootwaentjie, skopfietsie en al sy speelgoed saamgaan. Al dié goed plus my en Liezel se bagasie pas maklik in die bagasieruim. Ek het nog nooit gevoel ek moet ’n waentjie haak omdat die pakplek beperk is nie.

Ek het nooit eens na die X-Trail gekyk nie, want ek het gedink hy is buite my prysklas. Ek en my vrou het by ’n handelaar na ’n dubbelkajuitbakkie gaan kyk. My vrou was nie baie in haar skik met die bakkie nie. Ek ook nie, al is ek ’n bakkie-ou.
Ons kon skaars Adriaan se babastoeltjie op die agtersitplek inpas – die meeste dubbelkajuite het min plek vir die agterste passasiers. Die X-Trail staan toe net langs die bakkie en sommer uit nuuskierigheid vra ek wat hy kos.
Ons was verbaas oor die prys en het toe dadelik gevra om hom te toetsbestuur.
Liezel het ook ’n beurt gekry en baie van “haar” kar gehou. Toe ons wegry, sê sy: “Ek gee nie om hoe ons hom betaal nie, maar vir hom wil ek hê.” Drie dae later is ons met die X-Trail met vakansie.

Hy het so 157 500 km op die klok gehad en ek het intussen 7 000 km bygesit.

Die ruimte – vir mense én bagasie. Die 2,5  liter-enjin het lekker baie krag en ons sleep ons swaar ou woonwa sonder probleme. Hy het ook die 4x4-opsie en genoeg grondvryhoogte as ons van die teerpad af wil swerf. En, belangrik, hy het lugsakke.

Ja, hy toer ongelooflik lekker. Die sitplekke is gemaklik en hy raas nie op die pad nie. Hy sal ook beter wees vir wildkyk as die Mercedes omdat ’n mens hoër sit.

Ons het Namibië se grondpaaie met vyf grootmense en ’n sleepwaentjie aangedurf en ek was beïndruk. Ek het so te sê grootgeword op grondpaaie, maar het nog min ’n voertuig gery wat só stabiel is.
Hy het een of twee keer agterlyf weggegooi op die erge sinkplaat, maar dit was wanneer ek te vinnig gery het. Ek het hom toe in “Auto” gesit sodat hy self kan kies wanneer hy met al vier wiele moet aandryf.

Ek het al baie snaakse paadjies gery om sy 4x4-vaardigheid te beproef, maar sonder welslae – die paaie was almal in ’n te goeie toestand! Ek kan dit nie oor my hart kry om hom in takke in te stuur nie.

’n Bietjie te dors! Hy gee gemiddeld so 8,5 km/liter (11,8 liter/100 km).
 

Ja, ek het die motor gekry twee dae voordat ons met ons jaarlikse vakansie sou gaan. In die tweede week het sy kragstuur se pomp begin lek. Gelukkig was daar ’n  handelaar naby wat hom gou reggemaak het.
 

Alles. Daar is nie veel wat my pla nie; ek is regtig in my skik.

Enjin
Reguit-viersilinder, 2 488 cc (132 kW; 245 Nm) 

Grondvryhoogte
200 mm

Petroltenk
60 liter

Tenkafstand
Tussen 550 km en 600 km