Lus vir die kollig... of net ’n kolskootfoto?
Hierdie luiperd (heel regs) is onlangs afgeneem waar hy verby ’n krokodil en ’n groepie jong seekoeie loop by die St. Luciameer in die noorde van KwaZulu-Natal. Die normaalweg skugter katsoort het doodluiters gaan sit voordat hy later tussen die wortelbome verdwyn het.
Kruip die skugter luiperd uit sy dop by Afrika se grootste riviermonding?
'n Luiperd wat onlangs afgeneem is waar hy verby ’n krokodil en ’n groepie jong seekoeie loop, het hierdie idee laat posvat onder sommige bewaarders by die St. Luciameer in die noorde van KwaZulu-Natal.
“Ons het groot luiperdbedrywigheid die laaste paar dae gehad,” het Debbie Cooper, ’n woordvoerder vir iSimangaliso-vleilandlandpark, opgewonde aan Weg vertel.
Debbie, wat self die foto geneem het toe sy Sondagmiddag op ’n bootrit in die reservaat was, het die toneel as “verskriklik seldsaam” beskryf.
“Die luiperd het stadig in die rigting van die krokodil se stert geloop en toe oënskynlik van plan verander en tussen die wortelbome verdwyn," het Debbie per e-pos verduidelik.
Seekoei, krokodil en luiperd só saam-saam, is beslis iets om huis toe te skryf, het Greg Lederle, ’n professionele veldgids, vandeesweek beaam. “ ’n Mens sal seker sowat 20 jaar moet wag voor jy weer só foto geneem kry,” sê Greg, wat aangewys is as SA Toerisme se Gids van die Jaar by die onlangse Welcome Awards-seremonie.
- Klik HIER vir die fotogalery
Gelewer op 23 Julie 2010 | 10:22:21
Great foto! knap gedaan. Nou kort jy nog net 'n waterskilpadjie iewers in die voorgrond
Kommentaar