Visrivier

Eet ’n lekker ontbyt by Ai-Ais. Los julle motor hier en vertrek met die pendelbussie (R150 p.p. - Prys akkuraat in Maart 2010) na die beginpunt van die staproete. Onthou om julle permitte en mediese vrywaringsvorms by  Hobas te wys.
Probeer om so teen 9.30 vm. in die canyon te begin afbeweeg. Julle kan binne 45 minute onder wees, maar dit is beter om hierdie gedeelte, waar ’n  mens moet mooi trap teen die skuinste af, rustig te stap en groentjiestappers se senuwees te laat bedaar.
Teen ongeveer 1 nm. begin die middagskof. Wees van so 4 nm. af op die uitkyk vir ’n lekker slaapplek.

Dit is die strafste dag van die roete. Pak sommer jou rugsak die vorige aand, spring vroeg weg en eet ontbyt nadat julle al ’n ent gestap het.
Die roete tot by die swaelbron vleg tusssen rotse deur en oor sandstroke. Moenie moed verloor as julle stadig vorder nie. As julle net anderkant die swaelbron kan uitspan vir die tweede nag, vorder julle goed.
 

Die eerste drie dae stap jy deur die diepste dele van die canyon. Kyk rond en waardeer die natuurskoon. Die beste swemgate is ook op dié deel. Probeer om die 40 km-punt vandag te haal.
 

Gebruik die kortpaaie sodat julle die aand by die 70 km-punt kan oornag. Julle sal dan maklik teen vroegmiddag die volgende dag by Ai-Ais aankom. Stappers wat heelpad langs die rivier wil hou (sonder kortpaaie), moet dit oorweeg om iewers ’n ekstra dag in te werk.