Kosibaai-stap
Kosibaai verveel nooit. Die een oomblik is jy in 'n woud wat Tarzan huis toe sal laat verlang, en die volgende is jy op 'n wye oop grasvlakte.
Jy kan binne vyf uur met ’n motor van Durban af tot in ’n ongerepte stukkie subtropiese Afrika ry. Leon-Ben Lamprecht en die fotograaf Greg Ewing het by Kosibaai gaan stap en amper besluit om nie terug te kom nie...
Willie Labuschagne, wat Kosibaai se staproete bedryf, het ’n paar jaar gelede sy werk as rekenaarprogammeerder in Pretoria gelos en saam met sy Belgiese vrou, Isabelle (toe nog
sy meisie), Kosibaai toe getrek.
Nadat die vorige staproete hier by Kosibaai gesluit is omdat die geriewe agteruitgegaan het, het Willie en die plaaslike gemeenskap ingespring om die nuwe roete op die been te bring.
Jy stap twee of drie dae, nes jy verkies, tussen 8 km en 15 km per dag deur kus- en duinewoude, deur vleie, langs mere, oor riviere en op strande.
Jy slaap elke aand in ’n boskamp, wat nie ’n gewone ou staphut is nie, maar eintlik ’n gastehuis wat ook ander nie-stappende toeriste ontvang. En waar die vorige roete in Willie se woorde meer “hardcore” was, is dit nou ’n slenterroete waar jou bagasie vir jou aangery word.
Kosibaai 101
Hoe werk dit?
Ons het twee dae gestap en drie nagte oorgeslaap. Jy kan ook drie dae stap en vier nagte bly. Reël met Willie.
Hoeveel kos dit?
R1 660 vir vier dae – verblyf, kos en die vervoer van jou bagasie ingesluit. Dié prys word aangepas na gelang van wat jy wil doen. Die dagaktiwiteite kos ekstra (per persoon): kano – R100; seeskilpadtoer – R200; bootrit – R250. Jy kan ook perdry teen R250. Die stapgidse se tarief vir die hele tyd is R300, wat deur die groep as geheel betaal word.
Moet ek malariapille drink?
Dit is malariawêreld, veral in die reënseisoen (tussen Februarie en Mei). Sluk daai pille.
Beste tyd?
Die seeskilpadseisoen is van November tot Februarie. April tot Augustus is dit aansienlik koeler.
Wat moet ek bring?
’n Beperkte hoeveelheid bokswyn en bier word verskaf, maar jy is welkom om jou eie
te bring. Bring peuselgoed vir die stap.
Kontak: Jacana Marketing by 0861 5222 62; 011 656 0606 of bookings@jacanacollection.co.za of Willie by 072 727 3079. www.jacanacollection.co.za
Kommentaar