Drakensberge: Stap in die Tugela-kloof
Die Uthukela-waterval is op 950 m die naashoogste waterval ter wêreld en stort in vyf valle in die kloof af.
Jy was dalk al aan die bopunt van die Tugela-waterval, maar het jy al die spelonke en klowe van die rustige Tugela-kloof (“die Gorge”) aan die onderkant van die waterval verken?
Jy kan met dié kloof in die hartjie van die Drakensberge se voetheuwels (die “Little Berg”) opstap tot teen die Amfiteater se loodregte wande en die Tugela-waterval se dawerende waters.
Die Tugela-rivier het oor millennia vir hom ’n diep kronkelpad deur dié kloof gekerf.
Jy word aan drie kante omring deur hoë pieke wat lyk asof hulle tot teen die hemel strek.
Jy kan in die rotspoele langs die pad swem en op die groot klippe ’n bietjie aandag gee aan jou tan.
Aan die bopunt van die kloof, waar die Tugela-waterval neerstort, sny die rivierloop amper soos ’n reuse-wurmgat deur die rotse.
Hiervandaan kan jy na die voet van die waterval swem en stap – dis die ideale plek om middagete te geniet. Jy kan gerus voor die tyd by Ezemvelo KZN Wildlife seker maak hoeveel water in die kloof is; die meeste van die tyd kan jy deurloop.
Hou in gedagte: ’n Storm kan die situasie baie vinnig verander.
Kommentaar