Roofdiere

As jy graag roofdiere wil sien, kyk veral noordwes van die piekniekterrein en langs die suidelike Nhlangulenipad, die S34-Munywinipad en die S33-Vutomipad. Die digte plantegroei langs die S33 en S34 is ook ideaal vir luiperds. Die beste gebied vir jagluiperds is die S35-Lindandapad, die suidelike deel van die S37-Trichardtpad en die H1-2 na Skukuza.

Renosters en olifante

Olifante is baie algemeen in die gebied en sommige dae is daar sommer ’n klompie kuddes rondom die piekniekterrein. Die H1-2, H1-3 en H10 is dié reuse se uithangplek. Jy sal witrenosters teëkom in die oop gebiede langs die H1-3 tussen Tshokwane en Satara, terwyl die sku swartrenoster in die struike in die gebied skuil.

Kameelperde en sebras

Kyk uit vir kameelperde en sebras in die oop gebied noordoos van Tshokwane langs die S35- en S37-Trichardtpad, langs die kort S32-gruispad verby die Orpendam en die S33-Vutomipad.

Natuurskoon

Die stil, smal S33-Vutomipad neem jou deur pragtige natuurskoon na die Vutomidam, die speelplek van die waterbokke. Die res van die pad het besonderse plantegroei en is in ’n redelik goeie toestand. Die S35-Lindandapad is ook mooi.

Voëls

Daar is baie damme en watergate langs die H1-2-teerpad suidwes van Tshokwane, meestal aan die pad se noordekant. Kolganse, nonnetjie-eende, hamerkoppe, bontkiewiete, lepelaars, slanghalsvoëls, ’n verskeidenheid byvreters, visvangers en ander watervoëls kom hier voor.