Roofdiere

Skukuza kan óf ’n uitsonderlike ervaring óf ’n teleurstelling wees. Leeus kan jy vroegoggend op al die teerpaaie om die kamp sien, veral die S1  en die H1-1. Vir luiperds, ry vroegoggend stadig met die H4-1, die H11 en die S1. Die beste plek vir jagluiperds is die S30-Salitjepad, veral in die middel waar die veld oop is. Skukuza is die beste plek vir wildehonde – hulle is langs al die paaie, maar meestal die H11 na die Krugerhek en die oostelike deel van die S1-Doispanepad.

Renosters en olifante

Jy sal reuse-kuddes raakloop langs die H1-2 tussen Skukuza en die Tshokwane-piekniekterrein, en langs die H4-1-rivierpad. Die S1 is ook ’n goeie plek; kyk hier uit vir veral groot bulle.
Ry met die S65-N'waswitshakapad vir swart- en witrenosters of die S1 vir witrenosters. Kyk ook naby die kamp vir swartrenosters.

Kameelperde en sebras

Kameelperde is dikwels langs die H11-teerpad tussen Skukuza en die Paul Krugerhek en die S114-gruispad verby die Renosterkoppiesdam. Sebras word gereeld langs die S1  gesien, veral naby die Phabenihek waar die plantegroei minder dig is as by Skukuza, en langs die S4.

Natuurskoon

Vir die eerste 10 km aan die oostelike punt van die S1-Doispanepad ry jy deur ’n pragtige oop veld met massiewe bome langs die pad. Die kliprante is asemrowend in die dag se eerste of laaste sonstrale.

Voëls

Kyk uit vir papegaaiduiwe in die vyebome in die kamp. Die  Lake Panic-skuiling is 20 minute van die kamp af en die beste plek om ’n middag deur te bring. Hier kan jy reiers, visvangers, eende en ganse, dikkoppe, koningriethane en langtone sien en foto’s neem. Langs die H3-teerpad is troupante, veral in die somer, wanneer baie trekvoëls ook hier aandoen. By die H4-1-rivierpad is gewone vleiloeries, rooiborsbyvreters (in die somer) en ’n groot verskeidenheid roofvoëls.