Roofdiere

As jy ’n jagluiperd wil sien, ry suid met die S28 na die Krokodilbrug óf noord met die S128, S29 of H10.

Vroegoggend kan jy noord ry met die H10 vir leeus. Vir luiperds, ry met die H4-1-Sabierivierpad in die rigting van die Nkuhlu-piekniekterrein of met die  H4-2 in Krokodilbrug se rigting. Langs die H4-2 sien jy ook wildehonde. Die beste plek om die menssku tierboskat te sien is die grasvlaktes noord van
Onder-Sabie.

Renosters en olifante

Die H10-teerpad tussen Onder-Sabie en die Tshokwane-piekniekterrein is ’n goeie plek om na olifante te soek – in die somer sien jy soms sommer 100 in een rit! Langs die H10 en ander grondpaaie noord van die ruskamp sien jy witrenosters, terwyl swartrenosters in die struikgewasse suid van die kamp bly, veral langs die S82.

Buffels

Dié grasvreters wei in die vlaktes en in die somer wanneer kos volop is, sien jy kuddes van meer as duisend hier. Die H10-teerpad noord van die ruskamp en die S28-grondpad suid van die ruskamp is ’n goeie begin, maar al die paaie in die gebied kan buffels oplewer. Leeus volg in die kuddes se spore.

Kameelperde en sebras

Die beste roete vir dié langnekke en pajamaperde naby Onder-Sabie is die S28-grondpad tussen
Onder-Sabie en Krokodilbrug. Hulle behoort heeldag hier rond te loop.

Natuurskoon

Een van die mooiste paaie hier is die H10-teerpad by Muntshe-koppie, wat omring is met oop plantegroei en groot bome. Aan die westekant is ’n smal rivier en aan die oostekant is die manjifieke Muntshe-koppie. Ry dié stukkie pad stadig om die uitsig te geniet en wees op die uitkyk vir leeus en jagluiperds.

Voëls

Onder-Sabie se oop grasveld lok voëls wat skaars is in ander dele van die wildtuin, soos die geelkeelkalkoentjie. Langs al die grondpaaie net noord van die ruskamp is kwartels, patryse, langbeenkorhane en gompoue volop. In die somer is hier baie Europese troupante.
Kyk langs die Sabierivier uit vir gewone vleiloeries en by die Sunsetdam, vir driebandstrandkiewiete, bloureiers en bontkiewiete. In die somer sien jy ook gewone ruiters, nimmersatte en kemphane. Hou jou oë oop vir reuse- en bontvisvangers, reusereiers en kleinwitreiers by die brug oor die Sabierivier op die H10. ’n Verskeidenheid swaeltjies trek hier deur.