Roofdiere

As jy roofdiere wil sien, moet jy vroeg opstaan en die H4-2 teerpad ry, en dan die  S28, S137 en S130-grondpad. Jy kan die roete kloksgewys of anti-kloksgewys ry. Leeus is lief vir die H4-2, veral vroeg soggens. Kyk ook fyn in die ruigtes langs die pad – luiperd se kind kruip daar weg. Die S28 is oop veld en een van die beste paaie in die suide van die wildtuin vir jagluiperds. Gevlekte hiënas loop by die S137-pad by Duke se watergat. Die S130 is witrenosters en olifante se weiveld, maar gevlekte hiënas kan ook hier opduik.

Olifante en renosters

Witrenosters is volop rondom Krokodilbrug, maar die S130 is die beste plek as jy dié menere wil teëkom. Olifante maak gereeld ’n draai by die S130, asook die H4-2 naby die Gomondwane-watergat en die S28.

Kameelperde en sebras

Die oop veld om die S28-grondpad is kameelperdwêreld en sebras en blouwildebeeste wei ook graag hier. Die S25-Krokodilrivierpad kan ’n paar kameelperde oplewer, maar jy sal nie sommer ’n sebra sien nie.

Seekoeie

By die seekoeigat net wes van die Krokodilbrug-ruskamp langs die S27 het jy ’n goeie kans om seekoeie in die Krokodilrivier te sien baai. Dié ou grotes loop nou en dan vroegoggend oor die S25 terug watergat toe nadat hulle heelnag gewei het. Kyk ook uit vir seekoeie by die Ntandanyathi-skuiling en Gezantfomi Dam.

Natuurskoon

Die suidoostelike deel van die smal S26-Bumepad – moontlik een van die mooistes in die hele gebied – kronkel deur die geil Bumerivierplantegroei. Ry gerus ook die H5 tussen die S108 en die H4-2. Die S28 is ’n lekker oop pad terwyl die S130 plek-plek deur ruigtes loop.

Voëls

Die ganse Krokodilbruggebied is ’n voëlkykparadys, veral in die somer. Die natuurlike waterpanne wat ná reën langs die pad opdam, lok ’n verskeidenheid voëlspesies en is die ideale plek om foto’s te neem. Baie voëls kom kuier ook binne die kamp en roofvoëls en bromvoëls sal jy in die groot bome langs die H5 sien. Patryse en fisante wei graag in die renostermishope langs die pad. In die somer is daar ook witooievaars in die oop gebiede naby die kamp.