Sjokolade-splinterkoekies
Steek die blik weg as jy wil hê dit moet langer as 'n dag hou!
Jy kan los koekies maak óf dit in ’n vierkantige pan bak en in blokkies sny wanneer dit uit die oond kom.
Jy benodig
• 1 koppie sagte botter of margarien
• 1 koppie witsuiker
• ½ koppie klam bruinsuiker (melasse)
• 2 eiers
• 1 teelepel vanieljegeursel
• 2¼ koppies ongesifte koekmeel
• ½ teelepel sout
• 1 teelepel bakpoeier
• 1 plak (200 g) donker- of melksjokolade, in stukkies gesny
Só maak jy
1 Mmmm, romerig. Klop die botter, witsuiker, bruinsuiker, eiers en vanieljegeursel totdat die mengsel lekker romerig is.
2 En in die ander bak… Meng die meel, sout en bakpoeier.
3 Daar roer iets. Meng die meel met die roommengsel. Roer die sjokoladestukkies by.
4 Skep en drup. Skep teelepels vol van die mengsel op ongesmeerde velle bakpapier of gooi die mengsel in ’n vierkantige gesmeerde koekpan as jy blokkies wil maak.
5 Maak solank die koffie. Bak die koekies teen 180 °C. Die los koekies sal 8-10 minute neem, terwyl die blokkies vir 15-20 minute gebak moet word.
Weg sê: Steek die bak diep weg en deel die koekies een-een uit as jy wil hê dit moet langer as ’n dag hou!
Kommentaar