Lamsvleis-en-fetafrikkadelle
Deur 
Ryno Palm
Doop die brood in melk as jy sukkel om dit te rasper. Druk die oortollige melk uit en meng die klam broodkrummels by die vleismengsel.
Ryno Palm, ’n leser van Weg, het dié heerlike resep lank gelede iewers in ’n boek raakgelees. Deur die jare heen het hy die resep aangepas en vir sy familie en vriende vervolmaak.
Jy benodig
(vir 4 frikkadelle)
• 2 snye witbrood, korsies afgesny en gerasper
• 500 g lamsmaalvleis
• 1 ui, gerasper
• 1 teelepel fyn komyn
• 1 teelepel fyn koljander
• 3 eetlepels Italiaanse (platblaar-) pietersielie
• sout en varsgemaalde swartpeper
• 250 g fetakaas, gedreineer
• 1 eetlepel olyfolie
Só maak jy
1 Meng, Jannie, meng! Meng die brood, maalvleis, ui, speserye, pietersielie en geurmiddels.
2 Bolle rol. Maak jou hande nat, verdeel die mengsel in vier en vorm elkeen in ’n frikkadel.
3 Vervuld… Druk ’n holte in elke vleisbolletjie, vul elkeen met ewe veel fetakaas en vorm weer ’n bolletjie wat jy dan effens platdruk.
4 Rusfase. Bedek die frikkadelle met kleefplastiek en sit dit vir een uur in die yskas.
5 Warmplek toe. Braai die burgers vir ongeveer 10 minute oor matige kole en maak seker hulle
is deurgaar.
Weg sê: Doop die brood in melk as jy sukkel om dit te rasper. Druk die oortollige melk uit en meng die klam broodkrummels by die vleismengsel.
Kommentaar