Geurige beesstert

Deur Sonja Jordt

---

Share

Beesstert is soos Cremora: ryk en lekker. En op vakansie is dit nóg lekkerder, want dan kwel jy jou mos nie oor kleinighede soos cholesterol nie.

Jy benodig (vir 6 mense)
• 2 eetlepels olyfolie
• 1,5 kg beesstert, oortollige vet  afgesny
• sout en varsgemaalde swartpeper na smaak
• 1 groot ui, gekap
• 2 wortels, fyngekap
• 1-2 selderystingels, fyngekap
• 2 knoffelhuisies, gekneus
• 1 rooi brandrissie, ontpit en  gekap
• 1½ koppie beesvleisaftreksel
• 1½ koppie rooiwyn
• 1 kruiebondeltjie (die fynproewers noem dit ’n bouquet garni – sien die kassie op die vorige blad)
• die skil van 1 lemoen, in ’n lang reep gesny
• 4 teelepels tamatiepasta

Só maak jy
1 Lus vir ’n tan? Verhit die olyfolie in ’n groot kastrol en braai ’n paar beesstertstukkies op ’n slag daarin tot goudbruin. (Nee, moenie in die versoeking kom om alles sommer gelyk in te gooi nie; die vleis gaan dan stoom en uiteindelik sal jy met ’n kastrol vol vaal vleis sit.) Skep die gaar vleis op ’n  bord uit en geur dit na smaak met sout en swartpeper.
2 Uitblinkers. Gooi die ui, wortel, seldery en knoffel in die kastrol en roerbraai dit oor lae hitte.
Sit die deksel op en laat die groente oor lae hitte “sweet”. (Dit beteken dat die groente gaar stoom en eerder blink as bruin word.) Roer die brandrissie by.
3 Klink ’n glasie. Verhit die aftreksel en rooiwyn saam in ’n aparte kastrolletjie totdat dit kook. Skep die vleis terug in die kastrol met die groente en gooi dan die aftreksel-en-wynmengsel oor sodat die vleis net-net bedek is. Gooi die kruiebondeltjie, lemoenskilreep en tamatiepasta by en verhit tot kookpunt. Draai die hitte laer, sit die deksel op en laat dit stadig prut vir 2½-3 uur. Die vleis moet sag wees, maar nie van die been afval nie.
4 Koel, man. Haal die deksel af en laat dit afkoel. Sit die kastrol oornag in die yskas sodat die vet bo-op kan stol en jy dit maklik kan afskep.
5 Druk daai servet in jou kraag… Skep die vet die volgende dag af, haal die kruie en lemoenskilreep uit en verhit die bredie weer stadig. Sit dit voor met rys, stampkoring of ’n lekker tuisgebakte brood.

Gepubliseer op 1 Augustus 2010

Terug kos toe | Terug na bo