Mossels met 'n rooiui-vinaigrette
Heerlik pikant.
Ek is baie lief vir mossels en het dit die eerste keer vars geëet toe ek in die restaurantbedryf begin werk het. Die Franse sjef met wie ek gewerk het, het altyd hierdie gereg vir die personeel gemaak. Die asyn, rooi-uie en pietersielie met die mossels laat my altyd dink aan die tyd toe ons onder die akkerbome by die restaurant gesit en eet het.
Jy benodig
- 2 kg swartmossels, skoongemaak
Vir die Vinaigrette
- ½ rooi-ui, fyngekap
- 2 knoffelhuisies, fyngekap
- 1 klein rooirissie, fyngekap
- 30 ml vars basilie, pietersielie of koljander, fyngekap
- 60 ml wit balsemiekasyn
- 15 ml vars suurlemoensap
- 45 ml olyfolie
- 45 ml water
- sout en varsgemaalde swartpeper
Só maak jy
1 Laat hulle gaap. Skraap die mosselbaard af en skrop die mossels. Gooi dit in ’n groot pot kokende water en stoom dit totdat die skulpe oopgaan. Gooi enige mossels weg wat nie oopgaan nie.
2 Maak die vinaigrette. Meng al die bestanddele vir die vinaigrette saam.
3 Tyd vir voorsit. Sit die mossels voor met die vinaigrette in ’n aparte bakkie, of sit die mossels net so in die skulpe voor met die vinaigrette bo-oor gedrup.
Kommentaar