Braaiwenke
Dis nou maar eenmaal so: Ons hou van braai, veral in die somer.
Hier is 'n paar braaiwenke:
Botter die bief
As jy van biefstuk oor die kole hou met ’n sousie daarby, oorweeg gegeurde botter pleks van gewone sampioensous. Dit is dubbel so lekker, met die helfte moeite. Maak sommer jou eie gegeurde botter: Iets soos kruie-en-mosterd-botter, ansjovis-en-kappertjiesaadbotter of gorgonzolabotter is heerlik.
Bou ’n bielie-mielie
Meng gerasperde vars gemmer, gekapte rooi brandrissie, olyfolie, sesamsaad en heuning en smeer dit dan oor vars mielies voordat jy dit oor die kole braai. Dit verleen ’n uitsonderlike geur aan ’n doodgewone groenmielie.
Verf die groente
Meng 60 ml elk balsamiekasyn, suiker en olyfolie en verf dit mildelik oor groente (soos botterskorsie, groot bruinsampioene of halwe rooi-uie) terwyl dit oor matige kole braai.
Braai-uie
Rooi-uie kan ook in foelie toegedraai word. Sny elke ui in kwarte sonder om dit heeltemal deur te sny. Sit 'n takkie roosmaryn in elke ui en stip dit met 'n klontjie botter. Draai dit toe in foelie en pak dit in warm uitgebrande kole.
Aartappel met 'n jassie
Kook baba-aartappels tot net-net gaar. Draai 'n repie spek om elkeen en ryg hulle afwisselend met pikantrissies op 'n sosatiestokkie. Rooster hulle tot goudbruin en gaar.
Sosaties
As jy sosaties maak, onthou om die houtstokkies in water te week voordat jy die vleis of groente daarop ryg - anders slaan dit op die rooster aan die brand.
Gelewer op 9 Februarie 2010 | 21:16:42
As jy op kole braai plaas gesnyde uie bo-op die kole net voor jy die vleis begin braai. Die uie sorg dat daar nie flamme sal wees as die vet drup. Dit gee ook geur aan die vleis. Geniet Eddie
Gelewer op 15 Januarie 2010 | 16:05:28
Aartappel met 'n jassie - ha ha!
Gelewer op 14 Januarie 2010 | 14:01:36
Dis baie lekker wenke!! Gaan dit probeer.
Kommentaar