Wenke vir ’n watertand braaibroodjie
1. Rasper, Casper! Die kaas wat jy op die broodjies gebruik, moet grof gerasper word.
2. Raak gekonfyt. As jy nie lekker heelappelkooskonfyt het nie, maar net daai waterige stropie wat hulle in die winkels verkoop, meng jy eers die konfyt met die gerasperde kaas vóórdat jy dit op die brood smeer. Anders maak jy eintlik net ’n kaasbroodjie – en die lewe is te kort daarvoor.
3. Brood is nie meer boring nie. Deesdae kry ’n mens soveel soorte lekker volgraan-, gemengdegraan- en ander interessante brode dat witbrood eintlik vervelig is. Die growwebrood sit ook nie so maklik aan die rooster vas nie.
4. Botter hom behoorlik. Smeer die toebie goed met botter aan die binnekant, en nie aan die buitekant nie. Dit maak die broodjies dig, maar ook klam, en as jy dit dan meesterlik braai, smelt die appelkooskonfyt op die soet broodjies en die tamatie en uie op die soutige broodjies in die kaas in.
Kommentaar