Kerriepot

Deur Kerneels Breytenbach

---

Share

As jy geharde kerrie-eters as eetgenote het, kan jy sterk kerriepoeier (soos Hellfire of Mother-in-law) gebruik, andersins is dit raadsaam om milde kerriepoeier (soos Cartwrights) te gebruik. ’n Bietjie bedagsaamheid maak van ’n mens ’n goeie gasheer, eerder as ’n martelaar.

Jy benodig (vir 6 mense)

• ½ koppie olyfolie
• 1 skaapboud, in blokkies gesny
• 4 middelslag uie, in groterige blokkies gekap
• 10 kardamomsade
• 3 heel stukke steranys
• 1 kaneelstokkie
• 2 lourierblare
• 1 teelepel borrie
• 1 eetlepel sterk kerrie, of 1½ eetlepels milde kerrie
• 2 eetlepels rooiwynasyn
• 10 aartappeltjies, geskil
• ’n bakhand sultanas

Só maak jy
1 Sodra jou potjie goed warm is, braai die skaapboudblokkies en uie tot bruin.
2 Dun die hitte effens uit en voeg die kardamomsade, steranys, kaneel en lourierblare by. Roer deur en laat die vleis vir sowat 5 minute gewoond raak daaraan.
3 Sit die kerrie en borrie eenkant in ’n houer by die asyn, meng goed, en voeg dan by die skaapboudblokkies en uie.
4 Sit die aartappels bo-op.
5 Voeg ’n koppie kookwater by, sit die deksel op en laat prut vir ’n halfuur.
6 Voeg die sultanas by. As dit lyk of die vloeistof min raak, kan jy nog ’n bietjie kookwater bygooi.
7 Inspekteer jou hitte en vul aan indien nog. Laat die potjie nog sowat 10-15 minute lank prut.
8 Roer nou behoorlik deur en haal die potjie van die hitte af. Laat staan vir 5 minute sodat alles goed kan deurtrek.

WENK: Bedien saam met Basmati-rys, en hou bakkies blatjang, gekapte tamatie, piesangstukkies en klapper byderhand sodat almal gedurig daaruit ’n bietjie kan aanvul.

Gepubliseer op 23 Febuarie 2011

Terug kos toe | Terug na bo