Hoor, hoor vir die Hessequa!

Deur Jan Heenop

---

• Druk uit
• E-pos
• Bere
• Share
• 

“Daar is te veel mooi plekke in Suid-Afrika om net vyf te kies,” skryf Jan Heenop. “Daarom het ek besluit om te soek na dit wat in my omgewing, die Hessequa-streek, betowerend is – dis nou tussen die Breë- en Gouritsrivier.
“Ek besoek dié vyf plekke gereeld. Hier kan jy werklik in vrede saam met een of twee ander gesinne gaan afpak en die privaatheid geniet.”
Jan Heenop van Stilbaai wen dié maand ’n Pentax-verkyker ter waarde van R2100 vir sy bydrae.

Swem en stap by Grootvadersbosch
Noukloof is een van die mooiste klofies om saam met jou gesin te verken. Afhangende van die vaardigheid van die groep kan die klofie jou vir ’n uur of ’n dag besig hou. Jy kan heerlik swem in die swart water, jou vervies vir die bobbejane wat op die rotse vir jou sit en lag en jou verkyk aan die loodregte kranse en onversteurde inheemse bos.
Dié kloof is op Pieter Kloppers (028 722 1862) se plaas.

Kyk voëls by die Duiwenhoksrivier
In die valleie tussen Vermaaklikheid en Heidelberg is daar ’n versteekte klofie langs die Duiwenhoksrivier. Hier kan jy in vrede voëls kyk. Groot swartnekke, bloureiers en nagreiers, visvangers, kuifkoppe, kraanvoëls, wildemakoue en bergpatryse is volop.
Dié plekkie op Cecil Uys se plaas is afgesonder, jy kan oorslaap en ’n vuurtjie teen ’n holkrans maak. www.nonarosabushcamp.co.za

Verken Assegaaybosch op jou bergfiets
Bergfietsry is een van die beste dinge om ou rugbyknieë weer beweeglik te maak. Maar dit sukkel deesdae om ’n lekker trapplek te kry waar 4x4’s jou nie uit die pad uit ry of jong Turke stof in jou oë skop nie. Die Assegaaybosch-reservaat agter Vanwyksdorp is ’n naweekwegbreek waar julle die valletjies naby die Gouritsrivier se bolope kan verken, na watervalle gaan kyk en boegoe uitsnuffel. Assegaaybosch by 072 637 2992; info@assegaay.co.za

Kampeer by die Aardvark-sentrum
Het jy al van die Aardvark-sentrum gehoor? Johan Fourie het ’n stukkie privaatheid langs die mond van Pietsrivier toegekamp en jy kan dié kampplek langs ’n stroompie net met ’n 4x4 bereik.
Dié kampplek tussen Ladismith en Riversdal in die Klein-Karoo is netjies ingerig. Die beddegoed is skoon, die kampbedjies gemaklik én jy kry ’n verekussing om op te slaap. Die tent is ook bobbejaan- en muskietbestand. www.aardvarksentrum.co.za

Ry branderplank by Stilbaai
Hier is ’n plekkie in die Hessequa waar jy altyd ’n brander sal kry om te ry. Miskien weet die Gautengers nog nie van dié plek nie, maar ons noem dit Stilbaai se Morrispunt. Wees maar versigtig vir die groot witdood, dit is gewoonlik veilig as die plaaslike manne hoogwater in die see is. Die beste van alles is dat die “locals” hier nie dink die plek behoort aan hulle nie.

Gepubliseer op 4 Maart 2009

Terug na bestemmings | Terug na bo