Kamp is koning

Deur Thinus Groenewald

---

• Druk uit
• E-pos
• Bere
• Share
• 

Vir Thinus Groenewald en sy gesin van Durbanville is daar nie ’n lekkerder vakansie as ’n kampvakansie nie. Hier is sy vyf gunsteling-kampplekke:

1. Soek die halfmens in die Richtersveld
Die Richtersveld- nasionale park is die enigste bergwoestynpark in Suid-Afrika en geleë in die noordwestelike deel van die Noord-Kaap.’n Mens verkyk jou aan die vreemde, woestynagtige landskappe met die halfmensplant wat jou soms twee keer laat kyk. Daar is niks lekkerder as om by die De Hoop-kampeerterrein teen die Oranjerivier te kamp nie. By die Kokerboomkloof-kampplek voel dit weer asof jy die enigste mens op aarde is en jy wens die tyd wil stilstaan.
Kontak hulle by 027 831 1506 of besoek www.sanparks.org/parks/richtersveld/

2. Roei rustig op die Breërivier
Riggton is ’n klein, rustige kampeerplek op die oewer van die Breërivier by Bonnievale. Hier kan jy rustig op die rivier roei of kyk hoe die kinders op vlotte baljaar. Omdat hier nie baie kampeerders toegelaat word nie, leer jy gou al jou mede-kampeerders ken en hegte vriendskappe word gesmee. Die ablusieblok word skoon en netjies gehou met warm water vir almal. Koop Bonnievale-kaas op die dorp of gaan proe wyn op van die plase.
Bel 023 616 3091of klik op http://riggtonriverfarm.co.za/.

3. Ry ’n 4x4-roete tussen Citrusdal en Clanwilliam
Boegoeberg is ’n pragtige kampeerplek tussen Citrusdal en Clanwilliam. Die eienaar, Sybrie de Beer, laat jou gou tuis voel op sy plaas en sal jou rondwys as jy belang stel. Hier is ook ’n paar 4x4-roetes.
Die kampplekke is almal groot en privaat en jy braai te lekker in die gesellige lapa. Jy moet maar self die donkie stook as jy warm water wil hê vir die stort.
Bel vir Sybrie by 083 632 2634 of gaan kyk by www.trailguide.co.za/trlboegoeberg.html

4. Maak lyf nat in die Witterivier
Die Tweede Tol-kampeerterrein, wat deel is van die Limietberg-natuurreservaat, is geleë in die Bainskloofpas op die plek waar die oorspronklike tolhek in 1853 gebou is.
Stap lekker in die Witterivier op en neem foto’s van die pragtige berge. Hier is oral swemgate, moet dus nie jou swembroek vergeet nie. Vra vir een van die kampeerplekke wat langs die Wolwekloofrivier is en raak saans aan die slaap met die gekabbel van water in die agtergrond.
Bel 021 659 3500 of gaan kyk op www.capenature.co.za vir inligting.

5. Slaan kamp op teen die Sederberg
Die Sederberge is ’n gerieflike twee en ’n half uur se ry van Kaapstad. Baljaar in die waterpoele of stap tot by die waterval hoog bo die kampplek. Hier maak die kinders gou vriende en kom hulle net tent toe as hulle honger of moeg is. By Algeria kamp jy teen die berg en dit laat jou sommer nog nader aan die natuur voel. ’n Daguitstappie na die dorpie Wupperthal is ook die moeite werd.
Bel 021 659 3500 of gaan kyk op www.capenature.co.za vir inligting.

Gepubliseer op 24 Maart 2009

Terug na bestemmings | Terug na bo