Stil strand: Hamburg (naby Oos-Londen)

’n Idols-beoordelaar sou sê Hamburg het die X-faktor. As jy vir iemand wil wys hoe ’n Oos-Kaapse vakansiedorp moet lyk, bring hom hiernatoe: Plaasbokke in die pad, ’n strooisel strandhuisies en ’n lang, oop strand.
    Net rondom Kersfees is hier vakansiegangers en dalk ’n mense-redder op die strand, en selfs dan is die strand nie naastenby vol nie. Op enige ander dag in die jaar sal die strand bykans verlate wees.

Jy sal nie sommer ’n roomysstalletjie hier kry nie, maar as jy daarvan hou om lang ente langs die see te stap, is jy op die regte plek. Ook as jy wil swem sonder dat iemand met ’n lilo oor jou ry. Die spruite kan wyd speel en sandkastele bou – hou maar net ’n ogie, want die see kan nogal omgekrap raak.
 

Jy vat die kronkelgrondpad wat uit die R72 tussen Port Alfred en Oos-Londen afdraai – dis 11 km tot by Hamburg.