Kgalagadi: Nossob

Drie reuse-leeuwyfies bekruip ’n troppie rooihartbeeste naby Kaspersdraai. Dis genoem na Kasper Sanderson wat hier ’n put gegrawe het.

Van Nossob se twee hekke af is daar twee hoofwildkykroetes (al twee is omtrent ewe lonend): een noord in die rigting van Unie-Einde en een suid in die rigting van Twee Rivieren.
Onthou om jou wildkykpermit by ontvangs te kry voordat jy ry en weer in te handig wanneer jy laatmiddag terugkom.

In die oggend: 72 km, sowat 4 uur
Oggendfotowêreld
Staan saam met die daglig op en gaan maak ’n draai by die watergatskuiling – leeus kom suip soms vroegoggend hier. Wag dan totdat die rye voertuie by die hekke ’n entjie weg is, en ry dan noord na die Bedinktwatergat. Daar is gereeld leeus langs hierdie stukkie pad en jy kan jou ongelukkig ag as jy nie rooijakkalse sien nie.

Op pad kan jy by die Cubitje Quap- en Kwang-watergat stop. Net voor Cubitje Quap is daar ’n  uitkykpunt aan die linkerkant van waar jy ’n paar spogfoto’s van die sonsopkoms kan neem.
Cubitje Quap is oggendfotografiewêreld en lok gewoonlik sandpatryse tussen 7 vm. en 10 vm. Blouwildebeeste hou gereeld op die oop vlakte net noord van die watergat, en drink ook dikwels by Kwang.
Draai om by Bedinkt en kyk uit vir fluitrotte en streepmuise reg langs die pad terwyl jy stadig terugry kamp toe.

Heeldag uit: 280 km, sowat 9 uur
Tot hier toe en nie verder
Unie-Einde, die punt waar Suid-Afrika, Namibië en Botswana bymekaar kom, is ’n lekker daguitstappie van Nossob af. Dis sowat 140 km se ry; moet dus nie  te laat lê nie.
Op pad kan jy jou oë oophou vir veral leeus en groot roofvoëls soos sekretarisvoëls en swartaasvoëls by die Polentswa-watergat.

Die Lijersdraai-piekniekplek, omtrent halfpad Unie-Einde toe, is ’n goeie plek om bene te rek. Onthou net, hier is nie water nie; bring dus jou eie om te drink en hande te was.
Hou ook die doringbome in die omgewing van Kannaguass en Grootkolk fyn dop vir luiperds wat ’n uiltjie knip. Jagluiperds is weer lief vir die oop vlaktes suid van Unie-Einde.
Die Unie-Einde-piekniekplek, minder as 10 km van waar die drie lande ontmoet, is ’n lekker ontspanplek vir middagete.

Laatmiddag: 30 km, sowat 2 uur
Maak ’n draai by  Marie
Ry stadig suid en wees op die uitkyk vir rooihartbeeste in die omgewing van die Rooikop-watergat. Wanneer jy die Marie se Draaibordjie kry, hou jy regs en oor die heuwel.
Aan die ander kant sal jy aan die suidelike punt van Marie se Draai ’n tweede bordjie kry. Draai hier links om Marie se Draai vanuit die suide te benader.

Op dié omrit sal jy paaie kruis met veral bakoorjakkalse en silwervosse.
Wanneer jy by die watergat kom, sit ’n halfuur of wat terug terwyl jy wag dat die son sak. Die laatmiddagson baai gewoonlik die watergat in goeie fotografielig en boonop lok die water springbokke en  gemsbokke.

As jy gelukkig is, kom tree ’n trop leeus of ’n jagluiperd dalk aan vir iets te drinke.
Jy het genoeg kans om foto’s van die sonsondergang te neem wanneer jy terugry kamp toe.

Doen liewer jou eie namiddagrit en gaan sit dan na sononder vir 'n uur of wat in die skuiling.

Die skuiling by Nossob se watergat is so ontwerp dat die kampgeraas nie die diere wegjaag nie.

Spioeneer op die diere
Dié slim ontwerpte skuiling by Nossob se watergat is een van bestes in Suid-Afrika, en boonop lok die watergat hordes diere. Die gat is digby die skuiling en goed vir middagfotografie. Én daar is gereeld leeus, veral tussen 5 nm. en 5 vm.

Saans verlig ’n kollig die watergat totdat die kragopwekker afgeskakel word. Die lig lok insekte, wat op hulle beurt rooijakkalse en gevlekte ooruile nooi.
Die watergat is net mooi ver genoeg van die kamp af dat die kampgeraas nie die diere steur nie – die ingang is tussen die twee kamphekke en jy stap deur ’n lang tonnel om in die skuiling te kom. 

Moenie stilsit nie 
Nossob is al kamp in die Kgalagadi met ’n wandelpaadjie. Dié sandpaadjie begin in die noorde van die kamp naby die winkeltjie. Dit is uitgelê met wit klipppe en is net 800 m lank – selfs Ouma se brugvriende behoort dit binne ’n  halfuur te kan kafdraf.

Langs die paadjie is inligtingsbordjies wat jou meer vertel oor die gebied se fauna en flora, maar ongelukkig het ’n paar van die bordjies reeds omgeval.

Aan die bopunt van die paadjie het jy ’n mooi uitsig oor die Nossob-rivierbedding – dis ’n  goeie plek om te kyk hoe die son opkom. Voëlkykers kan ook hulle oë oophou vir geelbekneushoringvoëls, Kalahari-wipsterte en kardinaalspegte.

Genugtig, kyk al die voëls!
Die meeste oggende is daar ’n indrukwekkende vliegvertoning by die Cubitje Quap-watergat, sowat 10 km noord van Nossob. Gewoonlik kom drink honderde gewone tortelduiwe net ná die sonsopkoms, en teen agtuur se kant is dit die sandpatryse se beurt.

Massas kelkiewyne en gevlekte sandpatryse kom drink ook soggens. Eers maak die swerms ’n paar draaie oor die watergat voordat hulle op die rand land.
Dan drink hulle verwoed vir ’n paar sekondes voordat hulle eensklaps weer die lug in skiet.
Dis die rooinekvalke en swerfvalke wat die kelkiewyne en sandpatryse só op hulle tone hou.

Dié roofvoëls sit gewoonlik die saamtrek vanuit ’n kameeldoringboom en dophou, en hou hulle gereed vir  ’n  verrassingsaanval op ’n vet  sandpatrys.
Onthou, as jy te na aan die watergat parkeer, kom daar nie so baie sandpatryse nie en huiwer die valkies om nader te kom. In die reënseisoen sal hier minder sandpatryse wees aangesien vars poele water in die veld hulle lok.

Liefs nie saans nie 
Ek het eenkeer in die aand op ’n  wildrit gegaan en was teleurgesteld. Dit het baie gejaagd gevoel en die gids het ons nie veel vertel nie.
Ons het darem steenbokkies, springhase, silwervosse en bakoorjakkalsies gesien, sowel as ’n gevlekte ooruil en witwanguiltjie.

Doen liewer jou eie namiddagrit en gaan sit dan ná sononder vir ’n uur of wat in die skuiling. Maar as jy nagdiere soos ystervarke, springhase of ’n luiperd wil sien, is ’n aandrit steeds jou beste opsie.
Koste: R145 p.p. vir 2½-3½ uur

Pa, watse voël is daai? 
In die kamp: Nossob is bekend vir sy witkoluiltjies. Bedags skuil hulle een-een tussen die takke van die suidwesdorings. Die uiltjies is ná sononder aktief, maar sit jou kamera se flits af wanneer jy hulle afneem.

Namate water in die sementbadjies onder die kampterrein se krane opgaar, kom drink koningblousysies en mak rooikopvinke. Wees ook op die uitkyk vir gevlekte lysters wat tussen die tente na insekhappies soek.

By Cubitje Quap: Behalwe vroegoggend se massas sandpatryse en kelkiewyne, lok dié watergat ook ’n verskeidenheid roofvoëls op die warmer deel van die dag.
Van 1 nm. se kant af begin die sekretarisvoëls nader staan, en wanneer die son byna stilstaan, behoort swart- en witrugaasvoëls ook gesig te wys.

Tussen Nossob en Kwang: Op die oop vlaktes op dié stukkie pad kan jy die skaars dubbelbanddrawwertjie sien – veral 3 km suid van Kwang. Hou ook jou oë oop vir die Kalahari-wipstert onder kameeldoringbome en struike langs die pad.