Wieg van die Mensdom: Maropeng

Die hoofgebou word Tumulus (of “antieke grafheuwel”) genoem, en van voor af lyk dit inderdaad soos ’n groot heuwel waarvan die mure en dak met gras toegegroei is. Van agter – en dít sien jy eers aan die einde van die toer – is die Tumulus-gebou ’n futuristiese struktuur van staal en glas. 

Ná die bootreis op 'n ondergrondse meer kan jy in ’n  ondergrondse laning gaan kyk na uitstallings waarin allerhande vraagstukke oor die mens en die mensdom beantwoord word: Hoekom stap ons op twee bene en nie op vier nie? Hoekom eet ons wat ons eet? Waar kom die gawe van taal vandaan? Jy kan voel hoe menslike gewrigte werk, jou oog-hand-koördinasie toets (belangrik vir ’n jagter), of ’n knoppie druk vir ’n nabootsing van die genetiese “lotery” wat dinge soos jou oog- en haarkleur bepaal.

Een hele muur van die laan is afgestaan aan vraagstukke soos klimaatsverandering, habitatsvernietiging, bevolkingsgroei en die bewaring van ons natuurlike hulpbronne.
Daar is 'n bevolkingsteller wat vir jou wys hoe die wêreldbevolking toeneem: In die kort tydjie dat ek daar staan, slaan die telling oor van 6 610 049 964 tot 6 610 050 112. Dit word nooit afgeskakel nie. Dit hou net aan tel...

Sterkfontein en Maropeng is wêreldklas, en dis skaars ’n uur se ry van Johannesburg af. Maak sommer dié naweek nog ’n draai.

Kyk dié video van die ondergrondse bootreis - daar was bliksemstrale, stormwind, water wat uit die dak reën en af en toe 'n paar vlamme.