Weg Jou Reis Begin Hier

Soggens
Koedoes, leeus en jagluiperds (50 km; 3 uur)
Staan vroeg op en ry met die S92 tot by Balule, en van daar af reguit na die Bangu-watergat op die S90-grondpad (20 km, sowat 45 min.). 
Jy behoort sebras, kameelperde en koedoes op pad te sien én jy het ’n goeie kans om die gebied se leeutrop raak te loop. 
Ry gerus ’n entjie verby Bangu en hou jou oë oop vir jagluiperds, sekretarisvoëls en volstruise, want die veld is lekker oop hier. Ry dieselfde pad terug kamp toe.

Heeldag uit
Vir olifante (71 km; 3½ uur)
Ry noord tot by Letaba op die H8- en H1-5 teerpad (31 km, 90 min.) en dan terug Olifants toe langs die Letabarivier (met die S46-, S93- en S44-grondpad – 40 km, 2 uur). Jy ry deur mopanieveld en die kans is goed dat jy olifante gaan sien. Moenie vergeet om by die olifantmuseum te gaan inloer wanneer jy op Letaba stop nie.
Vir buffels, blouwildebeeste en jag-luiperds (104 km, ongeveer 4 uur)
Ry suid tot by Satara op die H8- en H1-4 teerpad (51 km, 2 uur) en dan terug Olifants toe op die S90-grondpad (53 km, 2 uur).
Dit neem jou deur van die oopste veld in die wildtuin en dis buffel-, sebra-, blouwildebees- en selfs jagluiperdwêreld. 
Jy kan op die brug oor die Olifantsrivier stop en uitklim. As jy gelukkig is, sien jy hoe olifante deur die rivier swem!

Laatmiddag
Die mooiste uitsig (50 km, sowat 3 uur)
Ry wes van Olifants af tot waar die H8 by die H1-5 aansluit (8 km, 15 min.). Draai regs en volg die teerpad vir 11 km (20 min.). Draai regs op die S46-grondpad. 
Hou regs tot jy by die Olifantsrivier kom en ry dan teen die rivier af (suidoos) tot by die Olifantsuitkykpunt wat op ’n krans hoog bo die rivier lê (31 km grondpad, 2 uur). Ry van die uitkykpunt af terug Olifants toe.

Ry fiets
Die Olifantskamp is een van net twee plekke ter wêreld waar jy tussen die Groot Vyf kan bergfietsry! Die roete vir trappers is ’n tweespoorpaadjie wat al langs die Olifantsrivier loop.
Moenie die Cape Epic verwag nie – dis maklik om te ry, al moet jy soms ’n stroompie oorsteek. Twee gidse laai jou met hekoopmaaktyd by Olifants of Balule op, van waar jy in ’n wildkykvoertuig tot by die vertrekpunt ry.
Net soos op ’n dagstap stop ’n mens gereeld om voëls, spore en mis te bekyk, maar grootwild is sku vir die fietse. Op ’n punt word die fietse neergesit en stap ’n mens af rivier toe om seekoeie van nader te bekyk – die hoogtepunt van die dag. 
Die fietse is ongelukkig in ’n baie swak toestand, maar dis steeds ’n heerlike ondervinding!
Koste: R375
Hoe lank? Ongeveer 4 uur.
Wat is die beste seisoen? Droë seisoen. In die somer raak dit nogal modderig.
Wat moet ek bring? Genoeg water, ’n hoed en sonbrandroom.

Soek ’n visuil
Die Olifantskamp bied die gewone oggend- en middagstaptogte aan, maar jy kan ook later in die oggend vir twee uur op die oewer van die Olifantsrivier gaan stap. Dan kan jy seekoeie en krokodille soek, en, as jy die gids mooi vra, die skaars visuil! 
Ons groepie is na ’n gebied naby Balule waar John gereeld die visuile sien. Ons stop vir ’n  nuuskierige kameelperd, ’n  trop bobbejane, vars luiperdspore en ’n stel koedoehorings. John verduidelik hoe die koedoebul reg deur die spiraaldraaie tot by die horing se punt kan sien.
En toe, skielik, gebeur dit – my eerste visuil! 
Blykbaar kom voëlkykers van oor die wêreld – so ver as Argen-tinië – om dié “lifer” te sien!
Koste: R150
Hoe lank? Ongeveer 2 uur.
Wat moet ek saambring? ’n Hoed en sonbrandmiddel.

En as ek nie kamp nie?
My gunstelingrondawels in die wildtuin is dié op die rand van die Olifantskamp wat oor die rivier kyk. Dit kos R705 per nag (vir twee mense), en die uitsig is fantasties. Die rondawels het twee enkel-beddens, ’n badkamer met ’n toi-let, wasbak en stort, lugreëling en ’n kombuisie op die stoep.
Indien jy eerder jou spaargeld op ’n bergfietsrit of rivierstap wil uitgee, probeer ’n rondawel in Balule teen slegs R205 per nag (vir twee mense; R84 ekstra vir ’n derde persoon). Hier word badkamers en kombuise gedeel.

Kamp by kerslig
Kampeerders wat lief is vir Olifants, kan gerus hulle woonwa tot op Balule sleep. Dié klein kampie is stil en het ’n heerlike Bosveld-atmosfeer.
Wees egter versigtig in die somer, want die kamp kan binne minute in ’n modderbad verander. En onthou, hier’s geen krag nie; bring dus ’n pakkie kerse saam.

Staanplekke: Balule se staanplekke het min skaduwee en dit word modderig in die winter.
Bly veral weg van die opvallende rooiessenhout links onder in die kamp wanneer die wolke saampak, want wanneer dit reën, vloei ’n rivier reg on-der dié boom deur! Naby die ingangshek, aan die linkerkant, is nog ’n skaduryke staanplek.

Badkamers: Balule se badkamers is klein maar skoon. Die storte is egter groot.

Ander geriewe: Daar is ’n gemeenskaplike kombuis met opwasbakke, kaste en twee gasvrieskaste. Hier is selfs ’n klein piekniektafeltjie en ’n wildkykbord waar jy kan aandui waar jy die leeus vanoggend gesien het.

Besoekers: Die makste Natalse fisant wat ek nóg teëgekom het, bly hier in Balule. Hier is ook geelbekneushoringvoëls, en in die somer broei windswaels buite onder die badkamers se grasdak.