Die Kruger se beste uitkykpunte

’n Mens word weer nederig by die Stevenson-Hamilton-uitkykpunt. Hierdie reuse-klippe is genoem na James Stevenson-Hamilton, die eerste parkhoof. Die Skukuza-kampplek was ook eers na hom genoem voordat dit in die taal van die Tsonga hernoem is.
Dié uitkykpunt het ’n pragtige uitsig oor die gemengde rooibos-bosveld van die suidelike Krugerwildtuin.
 

Dié uitkykpunt is op die Nkumbeheuwel geleë en word as een van die bestes in die Krugerwildtuin beskou. Sorg dat jou verkyker byderhand is, want dié uitkykpunt – met ’n grasafdak – bied ’n onvergeetlike uitsig oor die gras-vlaktes. Ná goeie somerreëns is daar dikwels waterpanne en die kans is goed dat jy een van die Groot Vyf gaan sien.

Hierdie is eintlik ’n restaurant en dameskroeg op ’n hoë houtdek binne-in die moderne Mopani-ruskamp. Dis op die oewer van die Pioniersdam en het ’n uitsig oor die dam en omringende boomryke koppies. Daar is byna elke dag buffels, waterbokke en olifante by die dam.
Watervoëls is ook volop. Eet ietsie by die restaurant en drink sommer ’n skemerkelkie terwyl jy op die uitkyk is vir wild.

Dit staan ook bekend as “Die venster van Afrika” en bied ’n goddelike uitsig.
Dis bo-op ’n heuwel wat ’n paar honderd meter bo die Olifantsrivier uittroon. Jy sal olifante, seekoeie en krokodille in die klipperige rivierbedding sien.  Die water en die diversiteit van die omliggende hardeveld lok verskeie voëlspesies. Die uitkykpunt is hoog genoeg dat jy selfs ’n  roofvoël in aksie kan sien.

Dié uitkykpunt is naby die Tshangarivier op ’n steil heuweltjie, ver van die besige pad af. Dis privaat en bied ’n ongelooflike uitsig oor die mopanieveld waarvoor die noorde van die Krugerwildtuin bekend is. Hier is slegs twee sitbankies, ’n kliptafeltjie en twee outydse toilette.
Dis olifant- en buffel-wêreld en jou kans om een van dié grotes te sien is byna gewaarborg.